Sermon

 

Luke 16:19-31 Chungin Theihtlei  Biatak Mana(7)

by:Rev.R. Lal Iap(CCCM Pastor)

 

Mahka caang cu mirumpa le Lazaruah kong asi i kan hngakchiat lio tein kan theih tawnmi asi. Cu caah hika bia chungin theihtlei deuh asimi kha zumtu hna kan thazaang laknak ah Mana si hram seh tiah saduhthah le thazacam buin van phuan ka duhmi a si.

 

(1) Tahchunhnak asi lo:

 

A hme 1 ahhin Mirang Bible(NIV) ahcun inverted comma ( “ ) timi in `ial asi. “ mirum pakhat hi a rak um ” ti zongah Lai Bible nih a leh ve `hiam. Hi bia  cu  tahchunhnak a si lo ti a fiantertu an si. Na unau ralrin petu dingah Moses le Prophets an um ko(v-29) tiah leh a si fawn caah hi mirumpa hi Moses/Prophets hna chan lio ah a rak um bakmi asi. Jesuh nih chan chankhat lio ah a rak cang taktakmi thil kha zei tuanbia hmanh ah rak `ial asi lo nain  a hngalh dih ko caah cu a cang taktakmi tuanbia cu cawnpiaknak ah a hmanmi asi. A lang lomi tuanbia dawh kha a langhter `hanmi asi.

 

(2) A min a `ial lomi Mirumpa

 

A hme 19-31 tiangah mirumpa ti lawngte asi a min aa `ial bak lo; mirumpa ti lawng si loin mirum pakhat ti asi rih; misifak pakhat a min  Lazaruh an timi zong kha a um ve(V-20).  Min `ial lo sullam cu: Hell tla ding poah hi cu an min `ial a hau lem lo; (Tahchunhnak ah Camepuai a sungmi min cazin an `ial theng ballo; a awngmi min cazin lawng `ial asi)Nunnak cauk ah an min `ial asi lomi hna poah cu mei tili chungah an paih hna(Bia 20:15).Tuufa nunnak cauk chung i an min `ial asi mi hna lawng kha khuapi chungah an lut kho lai(Bia 21:27). Cu caah mirumpa hi a rum caah hell kal ding asi si loin hell kal dingmi mirum tu asi. Lazaruh zong hi a sifah caah vancung ah a kai si loin vancung kai ding asi mi sifakpa tu asi. Rum hi hell tlaknak asi lo bantukin sifah zong hi vancung kainak a si fawn lo.

 

(3) A`ha tukmi Mirumpa

 

Mirum pa hi puan mansung bikbik in a thuam i nuam ngai in khua a sa (v-19) a ti ruangah misual tukah ruah ding asi lo:A ngaingai ahcun mirum `ha bak asi kan ti hmanh kan palh lai lo;Cahlun prophet hna nih mirum cu faktuk in sifakmi hna kongah ralrin rak pek lengmang cu si hna kaw(Isai 3:15,10:2, Amos 2:6, 4:1, Amos 5:11-12,8:4-6, Hab 2:9,-13), Sifak le nuhmei hramhkauh hi an i hnek bakmi asi.  Sifah hlei ah mizaw, zawt hlei ah fihnung asi mi Lazaruh, a kutka hram ah  rak chiah hnawh khawh lengmangmi asi hi a `hat tuknak asi. A rawl einak hram ah le rawl `il`awt uico he an i cuh:(Mitthlam bia:Uico nih a char kanh tawn caan zongah uico hngalh lo kar ah buhtlang a thlak pah kho men.)Amah nih a hna a tlak hmanh ah an nu le a fale nih an duh awk asi lo nain. Zankhat, nitkhat men asi lo; Bible nih “ an ratpi tawn” a ti caah a ni a tam ko lai. Sifak a daw, mizaw a hraam. A thil`ha tuahmi hi vancung kainak ah a rinh asi. Thil`ha tuah in vancung kai i timh cu Kalauk thimka luh a fawi deuh.Hi tluk mirum, mi`ha cu hell a tla ko ai.

 

(4) Saya(3)nih cawnpiak komi Mirumpa

 

(i) Rumnak cu pek asi: v-25 “ Thil`ha phunkip kha pek na si ” tiah Abraham nih a ti. A mah aa ruahnak ahcun ka hmuh khawh,ka kawl khawh a ti men lai nain Bible nih cun pek asi a ti caah petu a ngei:Pathian asi. Pekmi thil- a rumnak cu amah cawnpiaktu asi.

(ii) Bible hlun a thei- Lazaruh a dawt khawhmi hi Cahlun Prophet hna ralrin peknak in asi(Isai 3:15,10:2, Amos 2:6, 4:1, Amos 5:11-12,8:4-6, Hab 2:9,-13). Cu caah O.T cu amah cawnpiaktu a rak si ko.

(iii) Lazaruh a thi hmasa(v-22) Hi tuanbia ah Lazaruh a thi hmasa tiah a ti: Lazaruh thihnak nih a cawnpiak. Cawnpiaktu saya(3) a ngei hna nain a zumh hlei lo caah Hell ah a tla mi asi; A rum caah a si lo.

 

(5) A ruak a Lum taktakmi mirumpa

 

Lazaruh cu a thi i an vui ti a um lo; vancungmi nih an zuanpi;vancung puai ah Abraham pawngah an `hutter tiah Bible nih a ti. A nun lio i mirumpa innka hram a phak zong kha amah tein a si lo, an ratpi v-21. vancung zong hi amah tein a zuang lo; an zuanpi, Abraham pawng zongah khan amah tein a `hu lo an `huter ti asi. Lazaruh hi amah tuahmi a tello, tuah piak lawngte asi. Khamhnak a hmuh zong kha amah tuahmi asi lo a Bawipa nih a tuah piakmi asi. Mirumpa zong cu a thi ve i an vui(v-22b). Mirumpa ruak hi a lum bak ti a fiang ko.Thlan mual a thlahtu an tam bak. Funeral Service ah hlaremh a tam bak lai;solo a tam bak lai; zuunngaihpar a tam bak lai; a `apmi an tam bak lai; Midang cu chimlo Lazaruh rualchan le chungkhat le sahlawh hmanh nih a ruak cu a zual in an zual ko lai. Mah mirumpa hi a thih tikah ruak lum lo lai a phang bakmi a rak si ve lai. Thih tik ruak fimnak kongah a hna a ngam ngaingai ve mi asi. A ruak cu a lum ko; amah belte Hell ah a tla ai. Laimi ruak lum a duh tukmi hna Pathian biatak a tanh ngam ti lomi hna cawnpiaktu si hram seh!

 

 

(6) Thlarau Tlau Siaherhnak a Ngei Bikmi Mirum asi:

 

 Unau dawtnak a ngei bak, cu dawtnak cu hmunkhat teah khuasak`i dawtnak a rak si tawn nain atu ahcun hmunkhat um`inak kong asi tilo- asin kalve ti lonak unau dawtnak asi.Thlarau tlau zawn a ruat bikmi cu Jesuh asi. A changtu cu Evangelist pawl an si lo; Hell tla kan unau hna an si.(v- 28)Hell a tlak hnu zongah mirum ka ti rih nak chan cu a ngeihmi a um ko rih caah asi; a hman bel a hmang kho ti lo. Hell tla le ti tla an i lo; an lung a fim taktak si.Hell um Laimi kan unau hna nih an si a kan herh tuk ko lai mu ?

 

(7) Asi kho lomi nawl a hmangmi -Mirum asi:

 

Thil`ha tuahnak in vancung kai cu asi kho lomi asi: Cu cu a nun lio ah a rak tuah cang; A thih hnu Hell ram hmanh ah asi kho lomi kha Abraham cu a nawl rih: Lazaruh kha va `um `han sehlaw ka unau(5) kha ralrinnak va pe hna seh a ti(v-27-28). Jesuh nih Mary le Marta i an `apa Lazaruh cu thihnak in a rak thawhter kha mithi tho bia hi an ngai deuh hmanh hnga maw tiah a ruah caah a si: mitampi cu Lazaruh tehte khaannak in Jesuh an zumh(John 12:11) bantukin a zumlomi caah cun a Lazaruh kha thah chih an duh(John 12:10):Mirumpa nih Lazaruh kha va tho`han sehlaw a ti hi tho`han taktak hmanh sehlaw a unau(5)nih hin thah chap hmanh rak duh hna sehlaw hngalh lo pei a si tiah. Cu pinah thawh`hanter nak nawl hi Abraham nih a ngei lo.  A unau ralrin petu dingah Moses le prophet hna tu kha fak deuh in bia hei ka cah piak hna ti sehlaw a ning deuh hnga. Hrin`han lomi biachim cu an nun lio tein an palh lengmang le an thih hnu tiang an i palh ko lai. A holh a tam ngai nain asi kholo mi lawngte a holh caah a ngahfah lam a zual deuh lai.

Bawipa nih fiannak kan pe ko she Amen!

 

 

 

 

 

Khrihfa Sinak Cu Jesuh Kehram Phak Hi Asi

by: Rev.R.Lal Iap

Bible Caanthim: Math 2:1-6; Num 24:17f

Bible ah fimmnak(2) cu:

(1)Zumhnak a ngaanmi fimmnak cu va hrial(ITimothy 6:20-21)

(2)Khamhnak a phakpitu fimnak (IITimothy 3:15)

Nichuahlei mifim hna hi an fimmnak Jesuh Khrih kehram phaknak ah a hmangmi an si.

An fim khunnak cu Number 24:17 i Messiah a chuah cu van Arfi nih an chimh te hna lai timi biathli an hngalh hi a si.Nichuah lei mifim nih an ruahmi hi an palh tuk lo;Siangpahrang cu a dotdot in `uan asimi tuanbia khan an ruah i Jerusalem ah Siangpahrang cu um hna kaw-Jerusalem ah kan kal ahcun ka palh theng lai lo an ti. Herod nih Messiah cu khuazei ahdah a chuah lai? Tiah a hal hna i  Cathiang an van rel tikah Micah 5:2 bia kha Math 2:6 i an relmi cu a si.

Jesuh  A chuak Cang Ti A Theimi Hna:

(1)          Herod Siangpahrang chungkhar

(2)          Jerusalem khua chungmi

(3)          Tlangbawi upa hna

(4)          Phungbia cawnpiaktu hna:

A ho nih dah a chimh hna?

Arfi ,nichuah lei mifim le Cathiang nih an chimh hna.Tehte(3) a ummi bia cu zumh hrimhrim ding a si(John 8:17)

Jesuh Khrih cu a chuak deng cang ti a si lo, sen a pek lio a si ti zong a si lo,A chuak cang ti asi. Mah tluk tehte buu he fiang tein chimh a simi hna nih: 

 

Zeiruangah dah Bethlehem ah an kal lo?

 

(1)    Jesuh vawlei a ratnak biapi ah an chiah lo caah:

Rian nih a donhmi,upa sinak nih a donhmi,phung nih a donhmi, aa nautatmi,zei i a rel lomi,a huam lomi,Khuate a nautatmi,…. Tbt an si. Hi ngakchia pa hi mi nih an hlawt lai(Lk2:34),Amah ram ah le a mi hna sinah a ra nain a mi ciacia nih an cohlang duh lo (John 1:11).Jesuh nih a rat hlan in mah bantuk a si lai kha aa hngalh cia nain a ra thiamthiam ko: zeicatiah a kan DAWT caah.DAWTnak cu thloh khawh a si lo. A DAWTnak cohlan lo,dawtnak khirh hi a fak ngaingaimi a si.(Heb 2:3.. kan nihnih hi tluk in a nganmi khamhnak hi zeirel loin kan um ahcun zeitluk in dah dantatnak cu kan luat lo chinchin lai)

 

(2)    Jesuh Khrih cungah an lung a hrin ziar caah:

Khrihfa lakah Skeptic timi- a biaknak a lung a hring ziarmi an um tawn.Phungchim ko tung,Upa tuan ko tungin Khrihfa sinak a lung a hringziar mi an um nain an lang lo.hrinthannak kong chimh ah an i zumh kho lo,biatak chimh ah a herh ah an ruat kho lo, zeicatiah an lung chung tein lunghrin ziarnak an ngei.Jesuh hmanh hi ngaknu thiang hrin a sinak an zum dih ngam lo.Buu nganpi hruaitu pakhat pa le bang cu Uhsaciat( Arnu nih Arkhong tel lo in ti a tit)mi a hmuh in Jesuh zong hi pa tel loin a rak chuak tak men ko lai e a ti an ti cu.(Keimah kongah lungaw`awmnak a ngeilomi cu lunglawmmi a va si dah Math11:6)

 

(3)    Thlarau nih a tong cangh hna lo caah:

“ Ka Pa nih a hnuh lomi hna cu ka sinah an ra lai lo” ( John 6:44 )

Herod hi Jesuh lamkaltu tipil petu John biachimmi nih a lung a tuai ngaingai nain a zum duh lo(Mk 6:20)Jesuh hmuh heh tiah aa zuam lengmang(Lk 9:9)Herod cu Jesuh a hmuh tikah khan a lung a lawm ngaingai,zeicatiah hmuh a duhnak a rak saupi cang(Lk 23:8).Herod hi Galili peng uktu asi.Jesuh bia an ceih lio ah Jerusalem(Judea peng) a rak tlawn lio a si. Bia a hal sek nain Jesuh nih kaakhat hmanh a let duh ti lo, a caah innka a khar piak cang.Tipil Petu John chan lio tein Pathian bia a theih cang,Jesuh nih an peng chungah ah thawngtha a chim cang nain aa theih ter duh lo caah theih a duh tikah kaakhat hmanh chawnh a si ti lo.

 

Jesuh chuah fiangtuk in an thei ko nain an hna an i  phih khanh,an lung an i chawn khanh caah Thiangthlarau nih an thinlung ah rian a `uan duh ti lo.Jerusalem in Jesuh kong theih hi biapi a si lo; Bethlehem Jesuh kehram phak hi Khrihfa si cu a si.

 

Bawipa nih a bia thluachuah pe ko seh! A men.